श्रीयुत गंगाधर टिपरे

श्रीयुत गंगाधर टिपरे

झी मराठीवरील प्रेक्षकांच्या नजरा खिळवून ठेवणारी ‘श्रीयुत गंगाधर टिपरे’ ही मालिका आजही सगळ्यांच्या स्मरणात आहे. एक आदर्श एकत्र कुटुंब नेमकं कसे असावे हे या मालिकेतून उत्तमरित्या मांडण्यात आले. या मालिकेतील प्रत्येक कलाकारांनी आपल्या अभिनयातून प्रेक्षकांची मने जिंकली. कुटुंबावर आधारित या मालिकेमध्ये दिलीप प्रभावळकर यांनी गंगाधर टिपरे यांची भूमिका साकारली होती. तर अभिनेता राजन भिसे आणि अभिनेत्री शुभांगी गोखले हे त्यांचा मुलगा आणि सुनेच्या भूमिकेत दिसले होते. तर विकास कदमने (शिऱ्या) त्यांच्या नातवाची तर, रेश्मा नाईकने(शलाका) नातीची भूमिका साकारली होती.

एकंदरीतच हे कुटुंब आपल्या आसपासचे वाटावे इतके खरे, मनाला भावणारे. आपले विश्व विसरायला लावून आपण अगदी त्यांच्यात सामावून जातो इतके अप्रतिम कलाकृती. दिलीप प्रभावळकरांच्या अनुदिनी या पुस्तकावर तयार केलेली ही मालिका अजरामर ठरली. विनोद हे किती सहज असतात, हे या मालिकेतून समजते.सामान्य कुटुंबातील सामान्य प्रश्न ह्या कार्यक्रमानिमित्त अधोरेखित झाले.कुटूंबातील वयस्क माणसाची अडचण न होता त्यांचे कुटुंबासाठी असणे हे किती महत्त्वाचे आहे हे ह्या मालिकेतून समजते.दिग्दर्शक केदार शिंदे ह्यांची श्रीयुत गंगाधर टिपरे ही मालिका म्हणजे एका उत्तम कलाकृतीचा आविष्कार आहे.मालिकेमध्ये सर्वच पात्रांनी उत्तम अभिनय केला परंतु विशेष कौतुक वाटते ते दिलीप प्रभावळकर ह्यांचे.त्यांनी ह्या भूमिकेसाठी घेतलेली विशेष मेहनत त्यांच्या अभिनयातून दिसत होती.

मालिकेमध्ये दाखवलेली आबा व शिऱ्याची म्हणजेच आजोबा व नातवाची केमिसट्री विशेष आवडली.प्रत्येक भागामध्ये दाखवलेले विषय खूप आवडले.मालिकेमध्ये दाखवलेले त्यांचे घर खूप मस्त होते अगदी आपले घर वाटावे असे होते.शलाका व शिऱ्या ह्या भावा बहिणीतील प्रेम व भांडण अगदी आपल्या घरातील भावा बहिणीतील वाटले.अतिशय साधी राहणीमान व उच्च विचारसरणी असणारी ही टिपरे फॅमिली आपली होऊन आपल्या मनावर अधिराज्य केले.बहुतेक हेच गमक ह्या मालिकेचे लोकप्रिय होण्यामागे असेल असे मला वाटते.

श्रीयुत गंगाधर टिपरे ह्या मालिकेच्या सर्व टीमचे मनापासून आभार आम्हाला निखळ आनंद देण्यासाठी.

- सुयश गावड